【波Boot實測】: Nike Premier 2.0 FG @hkfootballreview Herman

原文鏈結 作者 Instagram Profile 作者 Youtube 頻道

文章已得到作者同意轉發 希望大家可以支持本地原創!

【傳統設計：Nike Premier 2.0 FG 實測】

球場開翻，波Boot實測又回來了。今次阿靴就會同大家實測一對推出咗較長時間嘅波Boot，亦可以話係袋鼠皮類別嚟講嘅性價比之選：Nike Premier 2.0 FG。

Nike Premier 2.0擁有傳統嘅波Boot模樣，佢既有鞋舌，又有袋鼠皮配以傳統拉線，的確回想到唔少舊時踢波嘅歡樂時光，更會諗起舊時托迪，朗拿甸奴及派路等球星於頂級賽事上嘅華麗技術。今次嘅實測，阿靴腳上嘅Premier 2.0更加係高貴嘅金色配上白色，當年2006年世界盃，朗拿甸奴就正正著過喱隻配色嘅Tiempo。

Premier 2.0 FG於2017年出產，係Premier嘅第二代嚟，隨住Tiempo運用科技不斷創新，Premier 2.0就為喜歡傳統袋鼠皮波Boot嘅波友繼續提供選擇。說實話，阿靴幾喜歡Premier 2.0嘅定位，除咗傳統有鞋舌，最重要佢不斷玩配色，提供到唔少靚仔嘅顏色組合。

用料上，Premier 2.0大部份位置都用上軟熟袋鼠皮，配以交叉車線，減低袋鼠皮因著用頻密而變型嘅可能。Premier 2.0係有鞋舌嘅設計，並配以魔術貼，令鞋舌更穩固咁連繫於Boot上。內鞋踭位置上，Premier 2.0 更加用上麖皮質料，內踭也會微微凹入，期望俾到更好嘅Lockdown。鞋釘上，質料上係普通嘅TPU膠，形狀就屬於短圓型。

經過實測及友賽，阿靴最滿意嘅係Premier 2.0嘅傳球發揮，特別於短傳上，Premier 2.0嘅力量感適中，袋鼠皮帶來嘅短傳球感亦非常出色，可以更得心應手地將球傳往目的地，阿靴亦喜歡Premier 2.0嘅腳內檔嘅內旋傳球，上佳嘅球感會更加明顯體現到。長傳上，Premier 2.0有一定重量，亦因為佢嘅重量，阿靴認為Premier 2.0嘅長傳力量感屬於充裕，球感就更加不用質疑，可以輕鬆做到一啲較柔嘅長傳。

阿靴亦滿意Premier 2.0帶來嘅觸球球感，Premier 2.0袋鼠皮唔屬於薄，而袋鼠皮內層亦會有一層墊。整體嚟講，阿靴認為佢帶到俾大家熟悉嘅傳統球感，較厚嘅袋鼠皮鞋面，除咗增強到控球球感外，亦輔助到控球，可以較輕鬆將皮球控下。此外，袋鼠皮亦會隨時間跟腳型貼合，相信隨著時間去，Premier 2.0嘅控球發揮會更加出色。

盤球上係Premier 2.0較弱嘅位置，Premier 2.0釘底由十二粒短圓釘組成，質料上則是普通嘅TPU膠，所以Premier 2.0唔會話有好強勁嘅速度感及靈活感，不過正正是佢係短圓釘，佢正正適合香港絕大部分嘅仿草地及草地。舒適程度上，Premier 2.0嘅軟熟袋鼠皮帶來舒服嘅質感，不過阿靴就略嫌Premier 2.0嘅鞋內底部會較為平坦，相對Morelia Neo，Monarcida等袋鼠皮Boot，Premier 2.0 則會比下去。不過，Premier 2.0嘅Lockdown相當理想。

射門上，Premier 2.0發揮屬於一般，腳面射門上，Premier 2.0有一定重量，帶來充裕嘅力量感，不過Premier 2.0 鞋面唔算平坦，腳面射門需要時間適應，才可以做出高質嘅腳面射門。至於腳內檔射門上，Premier 2.0用上較厚嘅袋鼠皮鞋面，亦為波boot帶來較強嘅摩擦力，射門弧度也會較明顯。

至於尺碼上，Premier 2.0 會有少量偏細嘅狀況，如果大家想於一開始穿著時尺碼合適，阿靴會建議你選擇大半碼，不過袋鼠皮係會隨時間跟腳形貼合，阿靴於Premier 2.0就會揀回正常尺碼，畢竟隨時間去，更貼合腳形會帶來更出色嘅球感。至於鞋型上，Premier 2.0屬於中腳形，不過亦都係袋鼠皮用料關係，阿靴認為中至闊腳嘅波友亦會合適。

Nike Premier 2.0 實測報告：
盤球：●●●
控球：●●●●
短傳：●●●●◐
長傳：●●●●
射門：●●●◐
舒適：●●●●
保護：●●●●●
.
感謝HKGBALLBOOT提供嘅波Boot！

產品鏈結:https://hkgballboot.co/search?q=nike%20premier%20III%20FG
--------------------------------------------------
【屎波裝備多Instagram】Follow: instagram.com/hkfootballreview
【波Boot實測】Adidas Top Sala Lux: https://youtu.be/R7Win_I5PQw
【波Boot實測】白飯魚: https://youtu.be/-dbvs0_YgiY
【波Boot比較】五對驚喜釘Boot: https://youtu.be/vzDRe25kkrM

Back to blog