【波Boot實測】: Mizuno Alpha Elite FG @hkfootballreview Herman

原文鏈結 作者 Instagram Profile 作者 Youtube 頻道

文章已得到作者同意轉發 希望大家可以支持本地原創!

Designed For Speed：Mizuno Alpha Elite FG 實測

Mizuno嘅袋鼠皮波Boot享負盛名，而佢亦一直發展新科技，期望可以將傳統與科技融入。Mizuno嘅Morelia Neo 3 Beta 就係其中一個代表，Knit織布鞋身，配以袋鼠皮鞋頭質料，期望帶到一對輕巧靈活嘅速度型袋鼠皮波Boot比大家，而於佢嘅Review， 發揮亦相當出色，令阿靴留下深刻嘅印象。於上年度尾，Mizuno亦推出一對全科技應用嘅速度型波Boot，佢取名做Alpha，目標係俾到大家一種前所未有嘅速度與輕巧嘅感覺。

今次阿靴實測嘅波Boot會係Alpha Elite，佢並非最頂級嘅日制版本。佢鞋面用上Woven織布質料，配以用肉眼睇到嘅波Boot骨架，期望有效咁固定到波Boot嘅鞋型。此外，骨架上亦用上海綿質料，期望波Boot同腳掌變得更固定。呢個設計，令阿靴諗返之前Mizuno推出嘅Rebula，不過當時Rebula係以袋鼠皮配以彈性骨架。

至於今次Alpha，佢就將科技應用於較薄嘅合成織布上。至於鞋面最外層上，Alpha質感會較黏，摸落去會有少少啜嘅感覺。鞋舌上，Alpha Elite用上傳統嘅鞋舌設計，鞋舌質料亦屬於薄。Alpha另外一個特別位置係屬於佢嘅鞋墊同鞋內踭質料，佢用上咗Zeroglide嘅科技，摸落去嘅質感會相當啜手，Alpha期望透過科技，俾到大家更強嘅Lockdown，以令大家嘅盤扭更加食力同靈活。於釘底上，Alpha Elite用上Enerzy Foam，一個應用於Mizuno運動鞋嘅緩震科技。至於鞋釘，Alpha Elite FG用上三角形釘，期望俾到大家更強嘅抓地力。

阿靴就著個Alpha Elite進行多次實測，最滿意嘅係佢帶嚟嘅盤扭感覺。阿靴認為Alpha Elite帶來更強嘅靈活感，加上稍黏嘅鞋面質料，於唔使點開鞋嘅狀況下，會感覺到佢可以更輕鬆將波盤帶去期望嘅路線，盤扭感覺亦會較痴腳。受惠佢既薄又黏嘅鞋面，盤帶時亦感受到腳與皮球非常貼近。此外，Alpha Elite嘅三角形釘帶來Agressive嘅抓地力，不過阿靴認為於仿真草上，三角形釘令抓地力變得更強，亦可以提升到大家嘅靈活感同速度感，不過阿靴會略嫌佢抓地力太強，因此腳腕所受嘅壓都會較大。於仿真草場上，大家都可以考慮佢嘅AG選擇，佢鞋釘會較密，而且會呈短圓狀，佢大大減低到大家於仿真草場上受傷嘅機會。

阿靴亦頗滿意Alpha Elite嘅傳球發揮，佢鞋面質料較薄，因此短傳感覺相當貼腳，質感屬於爽。此外，Alpha Elite嘅鞋面較黏，加上微微突出嘅骨架，佢可以提升到波Boot嘅傳球球感。Alpha Elite嘅長傳發揮更為明顯，波Boot可以非常應咁食落個波到。受惠於較薄嘅鞋面，Alpha力量感亦充裕，配以鞋面用上嘅科技及質料，Alpha Elite可以更輕鬆咁將波長傳去期望嘅位置。阿靴亦喜歡Alpha嘅側旋轉球，鞋面帶質料來更顯著嘅球感同力量感。

射門上，阿靴認為佢嘅腳內檔射門力量感充裕，啜身鞋面配以突出骨架，帶來唔錯嘅摩擦力，發揮相當驚喜。Alpha Elite射門質素會較急勁，而且弧度屬於明顯，會帶來一種輕鬆放個波去龍門網窩嘅感覺。腳面射門上，阿靴認為佢算容易射出較飄嘅波，Alpha Elite食落個波到都食得幾應。

Alpha Elite亦有唔好嘅位置，阿靴認為佢鞋口兩側位置做得較為低，變相仿草膠粒會更容易跌入波Boot裡面。此外，較低嘅鞋口亦令到足踝兩邊嘅保護變得較弱，增強咗受傷嘅風險。另外，Alpha Elite鞋面較薄，波boot嘅保護性亦會變得較低。阿靴著佢比賽時，防守時多次同人硬碰，基本上Alpha Elite係無咩保護，結果自己對腳就只能夠硬食。

總括嚟講，阿靴認為Alpha Elite係一對Mizuno創新嘅波Boot，佢所研發嘅織布合成皮相當成熟，配以多層嘅科技，阿靴會認為佢絕對可以同Mercurial以及X一較高下。此外，Alpha Elite設計貼近亞洲人腳型，鞋型屬於中至闊腳，市面選擇上的確會較為少有。尺碼上，阿靴認為Alpha無偏大無偏細，大家選擇返正常尺碼就可以。

Mizuno Alpha Elite FG 實測報告：

盤球：●●●●●
控球：●●●●
短傳：●●●●
長傳：●●●●◐
射門：●●●●◐
舒適：●●●◐
保護：●●◐

波Boot提供：@hkgballboot

產品連結